هل الوحدة هي افتقاد لشعور ام لأشخاص؟ ممكن تبقي لوحدك ومرتاح ومش حاسس بالوحدة وممكن يبقي حواليك ناس كتير وكلهم عاوزين يسعدوك بس من جواك حاسس انك وحيد. عشان كدة اكتشفت ان الوحدة هي افتقاد لشعور اكتر من اشخاص وغالبا مش بتحس بالوحدة اوى غير لما تجرب شعور معين فتحس انك محتاج تحسه تاني ولما متلاقيهوش تبتدي تحس بالوحدة. ممكن مثلا بتحس بالأمان مع اشخاص معينة او فى اماكن معينة ولما تبقي لوحدك بيروح الاحساس ده فتبدأ تحس بالوحدة مع انك قبل كده مكنتش بتحس بيها بس ده كان عشان انت مجربتش الشعور ده. بعد ما بتجرب حاجة انت كنت محروم منها بتحس ان ده من حقك انك تاخد الحاجات اللي انت محروم منها وساعات مش بيهمك الطريقة حتي لو غلط ومش بتحس بالذنب لأن الشعور ده من حقك. الوحدة بتيجي من افتقار للسعادة والسعادة بتكمن فى انك تكمل الناقص اللي جواك. هنا يبدأ الصراع جواك بين الصح والغلط وبين احقيتك فى انك تكمل الناقص ده فتبتدي تجرب اي بديل ممكن يلغي الوحدة من غير متلجأ للغلط بس بتبقي عاملة زى مسكنات للألم الداخلي و أول ما مفعولها يروح يرجع تاني الالم. الحل انك تبتدي تفصل بين الشعور والأشخاص وتفرق بينهم وتحاول تلاقي الشعور ده فى تفاصيل صغيرة فى حياتك انت مش واخد بالك منها وبكدة ممكن توصل لأحاسيس مفقودة وتبتدي تعوضك. طبيعي فى الاول مش هتحس بمتعة فى الحاجات دي لأنها كده كده موجودة بس تخيل لو الحاجات دي مش موجودة اكيد كنت هتحس بافتقادها وهتزيد الوحدة اكتر. دور علي الحاجات اللي ليها قيمة بجد فى حياتك وانت مش حاسس بيها عشان عينك علي حاجة تانية مش قادر تطولها. واهم من كل ده اعرف قيمة نفسك. مش شرط الغلط يحسسك بالحلو اللي فى حياتك ومش شرط الصح برضو يحسسك بالوحش. المعادلة صعبة ومحتاجة محاولة وصبر بس اهم حاجة انك تحس بالرضا انك حاولت وانجزت وهو ده الهدف.
الامان .. الوحدة .. الفراغ .. السعادة .. كل دي حاجات ممكن تفتقديها و انتي عندك اسبابها .. ممكن يبقى عندك كل مقومات السعادة .. صحة و تعليم و فلوس و اصدقاء و مظهر و مستوى اجتماعي لكن في النهاية مش سعيدة .. كل الحاجات دي رزق و السعادة كمان رزق
ReplyDeleteنفس الحكاية بالنسبة للامان و اكبر دليل على كده .. ان الناس دلوقتي مش حسة بالامان بعد الثورة و حسة بافتقاد الامن .. رغم انك لو تعمقتي في الموضوع هتلائي انها مافرقتش اوي يعني .. بس الامان مجرد شعور .. قيسي بقى كده على كل احساس بنحسه :)
صح كده وانا كل شوية امسك شعور من دول واعد افصصه كده
ReplyDeleteاول كلامك فكرني ب:
ReplyDelete"كيف أرجع إلى ما كنت قبلاً ؟ نعم عشت من غير حب وعشت سعيداً ولكنها سعادة الأعمى الذي لم ير الجمال ولكنك فتحت عين الأعمى وجعلته يبصر وينبهر ..فهل تحسبه إذا أرجعته إلى ظلامه الأول مستطيعاً أن يجد سعادته الأولى ؟"
- و عجبتني علشان حقيقية :)
حلو اوي الكلام ده :)
ReplyDelete